مشيرة موسي تكتب ” تعالوا نتحاسب “

يا نهار ابيض وزي الفل … السنة جريت … وبدأ العد التنازلي … نهاية عام وبداية عام جديد … كل لحظة وانتم والحبايب بألف خير …
تعودنا منذ الصغر ان نحاسب أنفسنا علي اساس يومي … شاي الساعة ٥ … ده كان وقت الحساب … كل واحد يحكي عن يومه … قال ايه … عمل ايه … الاتفاق غير الموثق بيننا كان لتحديد الإطار العام للتصرفات … طبعا وارد يحصل خطأ … الاعتراف بالخطأ … يعقبه دائما محاولة الاعتذار عنه او تدارك الموقف …
كبرنا وكل واحد بقي سيد نفسه … وقت الحساب عندي بقي قبل النوم … عملت ايه النهاردة … ممكن يحصل غلط … اكيد مش مقصود … الاعتذار مطلوب … كلمة ” اسف ” صعبة علي لسان ناس كتيييييير … محدش علمها لهم وهما صغيرين … الاعتذار للغير سهل … مقدور عليه … وابوس راسهم كمان …
الصعب هو ان الواحد يغلط في حق نفسه … يقعد مع ناس مش زيه … يصاحب ناس ما تستاهلش … يعمل اي حاجة ما يكونش راضي عنها ١٠٠ % … علشان كده … لازم نتحاسب … اتعلمت من أخطائي … إن الصح صح … وان السيرة الكويسة هي اللي باقية … علشان كده لازم نتحاسب …