مشيرة موسى تكتب ” روح رمضان “

عدت السنة هواااا … وجه رمضان يجرى … كل لحظة وانتم طيبين … عايزة اقول لكم علي سر … لا بلاش كلمة سر دي … عايزة اقولكم علي النصيحة الفصيحة … الحمد لله قدامكم لسه كام يوم … عايزاكم تقوموا تفتحوا الدواليب … وبمنتهى الأمانة تراجعوا اللي فيها … اكيد هتلاقوا حاجات زيادة مش بتلبسوها انتم والعيال … حاجات ضاقت عليكم أو وسعت ” وده أمر صعب شوية ” … حاجات صغرت علي العيال أو قصرت … احنا داخلين علي رمضان شهر البركة … ربنا يبارك لكم … اغسلوها وطبقوها كويس وشوفوا مين محتاجاها … رمضان مش بس كراتين اكل … اتعلمنا من واحنا صغيرين لو اشترينا بنطلون مثلا … نطلع بنطلون من الدولاب لحد ممكن يكون محتاجه … وطبعا الحاجة لازم تكون سليمة وشبه جديدة … والاقربون اولي طبعا …
ليه بأااااه انا بأقول كده … علشان هنلاقي اعلانات عجيبة … في الاذاعة والتلفزيون … مقترنة ببدء الشهر الكريم … معلش نصيحة من قلبي … في طرق كتيييييير ممكن الحاجات دي توصل لمستحقيها مباشرة … عن تجربة … صديقة وابنة عزيزة بعد وفاة والدتها طلبت احدي الجمعيات لأخذ كل شئ فعليا في شقة والدتها … بعد فترة قصيرة احتاجت احدي بنات الحي ثلاجة في جهازها … وعندما اتصلت ابنتي الحبيبة بنفس الجمعية … اوضحوا امكانية التوجه الي العنوان الفلاني لشراء الثلاجة … اه والله … يأخذوا الحاجة باليمين ويبيعوها بالشمال …
من كام سنة تعرفت علي سيدة فاضلة … مسئولة عن فصول محو الأمية في احد الأحياء الشعبية … بعد فترة بدأنا مشروع كان هدفه الأول مساعدة وتجهيز البنات غير القادرات … الآن اصبح لدينا معرض دائم ” لا ينضب ” … كل ما يعرض فيه يوزع مجانا تماما … المعروضات عبارة عن ملابس وادوات منزلية وأحيانا اثاث منزلي وادوات كهربائية … واؤكد مرة اخري ان كل المعروضات مجانية تماما …
رمضان مش بس صلاة وصوم … اكيد نشر الفرحة والبهجة وروح رمضان هو امر مستحب … إدخال الفرحة علي قلوب الناس هو امر مستحب … السؤال عن جار يعيش وحيدا هو أمر مستحب … جبر الخواطر هو أمر مستحب … انشروا المحبة وروح رمضان الكريم … جزاكم الله خيرااااااا كثيرااااااااا …