مشيرة موسى تكتب عن ” الخيانة وسنينها “
هو يعنى ايه خيانة ؟ وايه اللى انا ممكن اسميه خيانة … حد تانى ممكن يعتبره ” حاجة عادية خالص ” … انا هنا مش هتكلم عن الخيانة الزوجية بس … لا خالص … انا هتكلم عن انواع كتيييييير من الخيانة … من وجهة نظرى طبعا …
يعنى مثلا هو ليه الراجل ” ابو عنين زايغة ” لما يروح
مكان” ومعاه الست اللى متجوزها ” … مسموح له يبص ويبحلق فى كل الستات الموجودة ” السافرة والمحجبة … التخينة والرفيعة … الطويلة والقصيرة … الكبيرة والصغيرة ” … و فى نفس الوقت لو راجل تانى بص ناحية مراته تبقى مصيبة سودة … هو ليه هنا الراجل مش بيعتبر ان بصته وبحلقته دى خيانة …
هو ليه الرجالة فى الشغل بتتقمص دور ” الجنتلمان ” المقهور اللى عايش مع ” امنا الغولة ” فى البيت … وهو هو نفس الراجل اللي دايما بيقعد وسط زميلاته يندب حظه ويحكى انه لولا خوفه على مستقبل أولاده كان زمانه طلق مراته من زمان … والإضافة ” الكليشيه ” عند الصنف ده ” بقالى ٢٠ سنة انا فى أوضة وهى فى أوضة ” … مع ان عنده عيل عمره ١٠ سنين مثلا …
هو ليه الراجل المتجوز بيدخل ينقى ستات من على الفيس بوك وبمنتهى الوقاحة يدخل على البريد الخاص ليعبر عن إعجابه وحبه … علما ان هو اصلا مستخبى ورا اسماء وهمية ” الديك الذهبى أو الكتكوت اليتيم ” ..
عزيزى الرجل … الصداقة مسؤولية كبيرة اذا مش قدها بلاها … على فكرة انا مش ضد الصداقة المحترمة بين الراجل والست … يمكن اكتر ناس بيفهموا النوع ده من الصداقة هما اللى بيتربوا فى المدارس المشتركة … يعنى انا اصدقائي الصبيان من ايام المدرسة والنادي والجامعة … لسه اصحابى هما وزوجاتهم واولادهم كمان … الصداقة الحقيقية دى لو لقيتوها حافظوا عليها … عايزة احكى لكم عن شخص طلب صداقتى … هو مبدئيا دخل قرأ كل ما كتبت … وبعدين هو قرر أن انا مناسبة لطلب الصداقة … ” يا سيدى كتر خيرك ” … هو شايف ان هو عامل كل واجباته تجاه ” الست ام العيال ” … برضه يا سيدى كتر خيرك … ايه بأااااه المطلوب منى انا … انا بأااااه الشخص المناسب ” على حد قوله ” اللى ممكن يحكى معايا اللى ما يعرفش يحكيه مع مراته … ارد اقول ايه بأااااه … يا عم اختشى بأااااه … عيب عليك … الست الشقيانة اللى شايلاك انت وعيالك مينفعش تحكى معاها … وانا اللى جاية من كوكب آخر ينفع … أمشى يا عم الله يرضى عليك وخذ طلب الصداقة معاك وانت ماشى …
انا على فكرة مش سخيفة ولا قصدى اسخف من حد … انا كائن مسالم متفائل ينشر الحب والسعادة أينما حل … لكن عندى خطوط حمرا … ربما تكون غير مرئية … اذا حاول حد يتخطاها هيتكهرب … انا ممكن اكون اكتر واحدة باقول ” يا حبيبى ” ممكن اقولها لصديق وممكن اقولها لعامل قدم لى خدمة … لكن لو حد فسر كلمة الحب دى غلط … اكيد هيغنى ” ظلموه ” … انا كمان ممكن اكتر واحدة بتستخدم القلوب فى ردها على اى تعليقات على البوستات … لكن حذاري ان تفهمني غلط … فى فرق كبييير بين ان تكون متحضر فهمان أو ان تكون شخص خائن للتحضر.
