مشيرة موسى تكتب ” الاسبوع اللى فات “
أحداث الاسبوع اللى فات … مكانتش احلى حاجة …مع موجة الحر الفظيعة … الناس اللى فى الشارع كانت بتدور على حتة ضليلة … كل ما يلاقوا شجرة يلاقوا حد مقرر إزالتها بغشومية … يعنى عملية ذبح غير مبررة … ده على الرغم اننا اتعلمنا زمان جدااا … حديث نبوي” اذا قامت الساعة وفى يد احدكم فسيلة فليغرسها “… ماحدش جاب سيرة اقلعها من جذورها … مش عارفة مفروض اتكلم دينيا … ولا حفاظا على البيئة … ولا عن الشكل الجمالى … ولا ايه ولا ايه … شجر قاعد فى حاله … لا بياكل ولا بيشرب … مضلل المكان ومنظره حلو وبيحسن الجو … مالكم وماله … ليه البلدوزر يدخل بعزم مافيه علشان يوقع نخلة (لما زرعوها كانوا دافعين فيها فلوس ) … وليه المنشار يعدم شجرة رائعة الجمال واقفة فى مكانها بكبرياء بقالها عشرات السنين … مع العلم ان القانون بيحاسب اى حد يبنى حجرة صغيرة على الأرض الزراعية اللي ملكه … وفى نفس الوقت برضه نفس القانون بيوافق على تجريف ارض زراعية صالحة جدااااااااا علشان طريق أو كوبرى … وبعدين نروح نصرف علشان نزرع ارض صحراوي بديلة …. مش قلت لكم اسبوع كان مجهد عصبيا …
السوشيال ميديا بدل ما كانت مسلية … بقت سبب للتوتر … هل من حق الشخصيات العامة التمتع بالخصوصية … اكيد طبعا … لما يكونوا مع الأسرة والاصدقاء … لكن لما يكون بيحيى حفلة فى مكان ما … وواخد فلوس كتيييييير علشان يمتع الجمهور … فمش من حقه يتعالى على الناس … أو يقول انا أغنى اللى على مزاجى … واكيد مش من حقه يهين اى حد … كلمنى صديق عزيز وقال يمكن عنده وسواس ان حد يلمسه … قلت له ساعتها لازم يشترط يغنى على مسرح لوحده مش فى وسط ” المعازيم ” وفى حماية بودى جارداته … وقبل كل ده يروح يتعالج بجزء صغير من فلوسه الكتيييييير …
كتروا المنجمين والمتنبئين … والناس عمالة تجرى ورا ده وورا دى … طيب ايه … نفترض ان اللى قال توقعوا بركان فى البحر المتوسط طلع صح … هتعملوا ايه … لا حيلتكم طائرة خاصة ولا هتتحركوا من مكانكم اصلا … كمان ايه يهمكم مين هيتجوز مين ومين هيطلق مين … يا ريت تركزوا فى حياتكم وشغلكم وعيالكم وتتاكدوا انه ” لن يصيبكم الا ما كتب الله لكم ” …
مش قلت لكم كان اسبوع رغى كتيييييير … إن شاء الله نبتدي الاسبوع الجديد بالعيد وفرحته … ربنا يفرح قلبكم دايما وماتسمعوش غير الاخبار الحلوة … كل لحظة وانتم والحبايب كلهم متجمعين وبألف خير …