مشيرة موسى تكتب ” الالتزام وسنينه “

البيضة ولا الفرخة … تصوروا معايا كده انى فجأة اتبنيت كلب صغير لأول مرة فى حياتى … يعنى انا اصلا عمرى ما شوفت ولا لمست مخلوق بهذا الصغر … يبقى انا مفروض اعمل ايه … هو الحقيقة اللازم والاصول والمفروض … انى كنت اقرأ وأسأل الاول عن حاجات بسيطة جدااااااااا … انا عايزة كلب اعمل بيه ايه … يعنى انا شوفت صاحبتي عندها كلب فقررت اشترى كلب … وهنا فى فرق بين شراء الكلب وتبنى الكلب … ما علينا … طيب انا عندى المكان المناسب … طيب الكلب ده هيفضل صغير ولا هيكبر جدااااااااا … طيب الكلب ده شعره طويل ولا قصير وهل فى حد فى العيلة عنده حساسية … بلاش كل ده … الكلب ده هياكل ايه وتكلفة الأكل ده كام … وطبعا لازم احسب تكلفة الزيارة الدورية للطبيب البيطري … ومين هيعلمنى احميه … طيب بلاش كل الكلام الفارغ ده … أين ومتى سيقضى هذا الكائن الصغير حاجته … خاصة انه اول تلات شهور مثلا مش هينزل يتمشى فى الشارع … مع الوضع فى الاعتبار ان هذا الكائن الصغير مش هنرميه على السطوح ولا هنحبسه فى البلكونة أو الجنينة … وده معناه ضرورة قبول حدوث خسائر فى البيت حتى ننتهي من تعليمه الصح والغلط … ولأنها المرة الأولى زى ما قلت لكم هناك ضرورة للاستعانة بمدرب محترف … الله ده الموضوع طلع كبييييير وجد ومكلف … يبقى من أصله كده … لو مش قد الكلام ده وقد الالتزام … ما تحاولش اصلا وخليك بعيد …
طيب انا كده اتكلمت عن كائن صغير رائع هو ” الكلب ” … طيب ” ماذا لو ” كنا بنتكلم عن طفل صغير … ايوه … دلوقتى انا هتكلم عن تربية وتنشئة كائن صغير جدااااااااا … كائن صغير يحمل أسمى … يا نهار ابيض على هذه النعمة … ربنا ما يحرم حد منها … محدش يقول ما الخلفة دى شىء عادى وطبيعى… وجدودنا كانوا بيجيبوا عشر عيال … وطبعا العيال بتيجي برزقها … لا لا لا … الوضع اتغير تماما … قابلت عروسة جديدة قالت إنها محتاجة تعرف الأول اذا كان جوزها يصلح انه يكون اب لأطفالها اصلا … والله فرحت بيها … قالت كده بعد ما شافت عيال بتجيب عيال وبعد اول مشكلة صغيرة بتتخلى عنهم وتمشى … للأسف بنشوف شباب ” بنات وأولاد ” ما اتعلموش تحمل المسؤولية … قابلت مؤخرا امهات … للأسف سايبين عيالهم لماما أو للمربية الأجنبية بدون حتى متابعة … وسمعت حوادث بشعة … وشوفت امهات صغيرات فى كافيهات … تحتضن طفلها بيد وفى اليد الاخرى الشيشة … رجاء من القلب … الخلفة التزام … مش قدها … بلاش منها … خليكم عايشين حياتكم وبلاش تظلموا العيال … هى مش ناقصة …