بقلم/ الزجال الحاج هلال
بيروت وأصوات الموت
سبحانه مالك الملكوت
سيبك من العايط عالفايت
من قال ومن قولنا و قالت
***
خليك في الصابح والواضح
وبلاس اللي عقولهم غابت
سيبك من يوم عدى وفات
والأربع جاي بعد تلات
***
أسبوع وهيفوت أسبوع
عايش أو مات الموضوع
خليك في النافع والواقع
والمادنة كانت نور ساطع
***
م القرن الماضي ومين فاكر
وضح لي وفكرني يا شاطر
سيبك ما تكونش مهموم
ولا تزعل على شيء مهدوم
***
سيبك مين رايح ولا جاش
أو ميت ولا خدش معاش
سيبك ونصيبك هيصيبك
ما تقلش كلام عدى قديم
***
ولا تدي ودنك لحريم
كلمة قالها حكيم
عيشين بس زي الأموات
مش فاهم خليك في سكات
***
سيبك من العايط عالفايت
ولا تتكلم عن شيء بايت
تعقلها وتاخد أسبابك
تسمع للي دقونهم شابت
***
ناس غيرك عابت ولا تابت
ندمانة ودموعهم سالت
ليه الصوت على اللي مات
والصوت مايردش أموات
***
سيبك من صوت الجرار
وتوكل على الجبار
والحيطة تحت البرويطة
والفحرة فحرها المفحار
***
دك الشارع بانفجار
والناس استر يا ستار
داخل فاشخ ليل ونهار
بيروت محتارة ومنهارة
***
في ميدان والشارع والحارة
سيبك من الحاجة أم نجات
وبناتها والست جملات
في لطيم وشق الخلقات
***
والعايط لو رد الفايت
كام عايط على ميت مات
والميت لو عاد بالعايط
راح نبكي ونزيد في عياط
***
ودموعنا نزرعها نبات
وبلاش المخنوق في السوق
والفاجر داخل محموق
زي ما يكون شيطان مجنون
***
والخنازير بتجيب من فوق
م الفاجر إمداد ومسوجر
بيروت مفجور ومحروق
والناس في السوق ويا التاجر
***
محروق وطالع محقوق
سيبك من الأرض اللي بتطرح
مزروعة وبتجيب إنتاج
خليك في الطير اللي بيسرح
***
وهايرجع أفواج أفواج
سيبك من الميه اللي بتطفح
كام جركن هاتكون محتاج
خليك في الأرض الزراعية
***
لو بارت وبلاش إزعاج
خليك في الأرض المحتلة
واذكرها في أي حالات
دي أراضي فيها البركات
***
ولا فايدة في مؤتمرات
ملوخية واطبخ في الحلة
تقلية وسبع بصلات
والقعدة على الطبلية
***
والطبخة شربة وبهرات
سيبك من أفلام السيما
ولا تسمع مسلسلات
أفلامنا باهتة وقديمة
***
كان ليها عالحيطة شاشات
فيها ضحك وكان قلة قيمة
رمضان وتنزل بالذات
مش فيها ولا كلمة حكيمة
***
وأغاني فيها مسابقات
سيبك من العايط عالفايت
ولا تاكل في الفول النابت
سيبك من خالتي ومن خالك
***
خليك مع حالتي ومع حالك
سيبك من الحامض والبايت
ولا تسمع أي عقول خابت
عفاريت الجن وعلى بابك
***
شياطين وضفات ضفات
سيبك من وقفة عرفات
والشياطين قافلة الطرقات
خليها نسهر لياليها
***
أيام وهانصومها طعات
سيبك من رجم العقبات
وارجم إبليس بالحسنات
سبت وحد واتنين وتلات
***
والأربع لو عدى وفات
خليك الخميس والجمعة
وابعد عن سمعة وابو لمعة
خليك في الصلصة وفي الدمعة
***
هاتصوم وثواب مش هيضيع
لو تعطش جوع لو أسبوع
أسابيع وفيها التطبيع
والدوخة فيها الترجيع
***
مشهورة وكفاية السمعة
خليك مين عايش مش مات
ومعاش للحاجة عنايات
شهرين وادخل في التالت
***
مشوار وكله مطبات
خليك في الواضح والراجح
والموضوع صابح مش فات
بيروت وصوت مليان موت
سبحانه مالك الملكوت