مشيرة موسى تكتب ” قهوة المعاشات “

كل لحظة وانتم والحبايب بألف خير … ربنا يسعد أيامكم … سنة جديدة تيجى ومعاها الخير كله ان شاء الله … امبارح الصبح اتفقت مع صاحباتى نشرب قهوة فى كافيه هادى جنب البيت … قعدنا بره فى الهواء الطلق …الدنيا كانت شمس لكن فى نفس الوقت الجو كان ساقعة وهوا … بره فى التراس كان فى واحدة من احلى شجرات الكريسماس … الشكل والزينة تحفة بصراحة … لكن الشجرة كانت مايلة لقدام علشان الزينة كانت اتقل من الناحية الامامية … شوية وشوفنا الشجرة وهى بتقع … الشباب لحقوها قبل ما تلمس الارض … لكن شوية من الزينة طار فى الهوا … الشباب رجع الشجرة مكانها … لكن الميل زاد اكتر … شويتين والشجرة قررت الانتحار تانى … المرة دى سمعنا حاجات كتيييييير بتتبعتر على الارض … والشجرة نفسها اتقسمت اتنين … ليه بأااااه باحكى الحكاية دى … علشان احنا اتعلمنا زمان مثل بيقول ” أدى العيش لخبازه ” سيبكم من النص التانى لان خبازه مش هياكل تلات اربعه … ده كلام فارغ … ممكن الناس فى الكافيه يكونوا دفعوا دم قلبهم لحد يعمل زينة الشجرة … لكن هو اهتم بالشكل فقط للأسف … وكل مجهوده طار فى الهوا وبدون فايدة …
بمناسبة الكافيه … انا كان نفسى اعمل مشروع ” قهوة المعاشات ” لما اوصل لسن النضج (٦٠ ) … مش اى قهوة وخلاص … لا طبعا … قهوة باشتراك شهرى … كل واحد من شركاء الزمن الجميل ” ستات أو رجالة ” بيملأ استمارة اشتراك … بيكتب فيها نوع الفطار اللى بيحبه والجرنال اللى بيحب يقرأه … وطبعا الشباب دول متعودين يصحوا بدرى اصلا … ولأن كتيييييير منهم ممكن يكونوا عايشين لوحدهم وعيالهم كبرت … فميعاد اللقاء الصبح من بدرى على القهوة … الفطار بيكون جاهز والجرنال جاهز والراديو شغال … والكلام والفضفضة مباحة … ساعتين تلاتة من لقاء بنى ادمين حقيقيين بدل من القعدة فى وحدة … اكيد اللقاء ده كان هيرفع المعنويات ويعدل المزاج ويخلينا نطمئن على بعض … والقهوة مفتوحة لحد الساعة ١٢ بس … اكتشفت ان حلمى صعب التحقيق … يمكن علشان الاجراءات التعجيزية … ويمكن علشان الناس بطلت تقرأ الجرايد … ويمكن علشان انا بطلت احلم … بس اللى لسه عارفاه ومتأكدة منه … إن السن ده جميل … وانه سن بداية مش نهاية زى ما بعض المتشائمين شايفينه … لأول مرة الواحد بيعمل الحاجة بمزاج وهو مش بيجري علشان يلحق كذا ويلحق كذا …بس المهم الواحد من جواه يبقى مقتنع … الماكينة بتهدى لكن مش بتقف … انا شخصيا حضرت نفسى للاستمتاع بالوقت ده قبل ما اوصل للمحطة دى … بتفرق كتيييييير والله … لو حد عايز يطبق الفكرة بتاعتى … حلال عليه أنا مسامحة … بس يبقى يعزمنى احضر الافتتاح … وكل لحظة وانتم والحبايب طيبين …