أدب
مع الوحدة
مع الوحدة
بقلم : يسرا صقر
صوابع إيد بتتجمد
ف ليلة شتا باردة
وعالشباك ….
قلوب مرسومة بالأبيض
ب أنفـاسـَك وكام وردة
وحِسك فيك بيتردد
صداه جـُواك
ولا بيـهدا …
عيون ف مراية بتحدد
ملامح وِشـَّـك الجامدة
بتقـاطيعك إللى هـِـيَّاها
مش بتتجدد …. عليك شاهدة
و جسم وحيد بيتمـدد
ليلاتى ف الضـلام مـادَّه
ونفس القاعدة ف فراندة
على كرسيك إللى متنجـد
وإيدك عالخدود ساندة
ونفـْسـَك ليك بتتودد
وبتلاغى شفايفك
إللى عالسكوت واخدة
وفنجان قهوة ليك يبرد
وضحكة حلوة تتـبدد
ف وسط دموعك الشاردة
وصبحك هوَ هوَ مـِسـاك
لا شىء يِفـْرِح ولا ينكـِد
ولا بتتحل دى عـُـقـدة
ل كوم شرابات بتستنجد
ناقصهم خمسمية فردة
وإيدك إللى بتطبطب
عليك … وإللى بتهدْهـِد
مفيش غيرها من مـُدة
على حالك بتتنهد
خلاص سـَلـِم … مفيش فايدة
و واحدة واحدة تـتـعود
وتـاخد يا إبنى ع الوِحـدة