كنتي
كنتي
حاج هلال
كنتي حلوة يابتسامة
لما كنا صغيرين
بالبرائة والسلامة
إيه ياحلوة رحتي فين
هي ماتت الشهامة
إغتلوها البني آدمين
كنت عايش باستقامة
بهدلوها شمال يمين
كان زمان مرفوع و قامة
بين الناس طول السنين
عشت محفوظه الكرامة
وجم داسوها الكدابين
كنت كافي خيري شري
وانحوجت للبخيل
وإللي عالم كل سري
هو بس ربي الجليل
بدعي ربي كشف ضري
ياما جابلي المستحيل
عمري فايت دغري يجري
وفي الآخر ما لقيت خليل
هو انا ظلمت نفسي
بالتبذير على البخيل
قلت عالخير ماتندمشي
ودلوقتي مريض كبير
كنتي حلوة يابتسامتي
وكان زمان الطيبين
ماشي عايش باستقامتي
وبهدلوها شمال يمين
مش زعلان من الزمان
زعلان علشان أنا غلطان
من أحبابي ومن أصحابي
من إهمالي والنسيان
و آخد بالي و شايف حالي
كان زمان مايجيش في بالي
وإن الدور لازم هيدور
يجرة كل اللي جرالي
إبيض شعري والشيب بان
وراح حماسي وانا هفتان
ليه الناس نسيوا الغلبان
والإنسان طبعه النسيان
أنا زعلان منك يازمان
أنا غلطان لكن ندمان
شايف نفسي مهمول منسي
أعوذ بالله منك يا شيطان
أنا غلطان وإيه ها يفيد
إبني و بنتي واللا حفيد
لما بقوم نفسي امسك إيد
إيد تسندني ونور بيقيد
مين يحضني وحب يزيد
لما يزروني بس ف العيد
وازيك ويبوسني ويمشي
ويطلع يجري سايبني قعيد
إسمعني يابو قلب حديد
واليوم جاي من غير مواعيد
عمري وعمرك يعلم ربك
راح ترتاح وهاتبقى سعيد ؟
لما بقيت فوق الستين
قولت رح ترتاح بسلامة
واللي شوفته في عمري سنين
شقيان وعرقان بكرامة
كان في شبابي وشغل الإيد
والأسباب من فضلك سيدي
واللي في جيبك ستر العيب
خلا الكل صاحبي وحبيبي
وانا وصحابي ولبس عياقة
لعب و خفة وكل رشاقة
والنشاط كان ألف قيراط
والثقافة و اللباقة
إللي باقي مني بكام
غير دلوقتي بس كلام
أمشي وساند ع الحيطان
واحسب في عدد الأيام
كنتي حلوة يابتسامة
لما كنا صغيرين
والبرائة والسلامة
لما كبرنا رحتي فين
هي ماتت الشهامة
……..واغتلوكي البني آدمين
عشت ماشي باستقامة
………وبهدلوها شمال ويمين