الطبعه الاولي تحاور مطرب الراب« مصطفي موسى » عن بداية مشواره في الراب
كتبت/ آية حسين ابوبكر
في البداية انا اسمي مصطفى أحمد محمد موسى معروف ب مصطفى موسي عندي ٢٠ سنة من محافظة سوهاج طالب في كلية تجارة جامعة سوهاج رابر وكاتب اغاني وملحن وحاليا بدأت في دراسة وتعلم هندسة الصوت والميوزك بروداكشن.
من وانا صغير كنت بحب جدا اكتب واغني وكنت بحب اسمع انجلش وراب وقتها مكنتش اعرف ايه دا غير ان دي الاغاني السريعة بالصدفة سمعت تراك بالعربي لإيجي راب سكول كان زي اللي بسمعو فالانجلش وقتها بقا عرفت ان دا اسمو راب.
بدأت راب في ٢٠١٥ كان عندي ١٢ سنة وقت ما بدأت كانو بيقولو عليا اني اصغر حد علي مستوي الصعيد وقتها بيراب وطبعا حوار السن دا كان مشكلة كبيرة بسبب ان الاغلبية كانو فاكرين اني بلعب او مش فاهم دا ايه فكنت بلاقي كومنتات زي هش العب بعيد وروح شوفلك حاجة تاني اعملها وكنت بلاقي ضحك كتير علي كلامي وصوتي علشان سني كان صغير جدا وكمان علشان الراب فالصعيد مكنش متعارف عليه ومحدش كان فاهم ايدا وقتها “بس حلو انك تفضل مصدق نفسك وواثق فيها ومكمل مهما كان الكلام اللي بيتقالك ومهما كان الاذي الموجود في طريقك وايا كانت الظروف حواليك”
في ٢٠١٨ نزلت اغنيتين كان ليهم سبب كبير فإني اتشاف وفإني مكمل لحد النهارده لإني مكنتش ناوي اكمل بعدهم ولكن رزق ربنا كان كبير الحمدلله ولقيت ردود افعال حلوة اوي والناس بتشجع وتقول كمل واللي مكنش بيدعم بقا يدعم وبقا في ناس فعلا بتتابع ومستنيه الجديد بجد وقتها بقا خلاص اقتنعت اني اكمل والحمدلله في ٢٠١٩ تم استخدام اغنية “الحلم” كأغنية دعائية لحملات وحفلات يوم اليتيم من جمعيات خيرية كتير واغنية الحلم كانت جزء من البوم حياة اللي كان نقلة كبيرة اوي في حياتي بالذات بعد اغنية وداع اللي خلتني مسموع برا سوهاج اكتر من سوهاج نفسها
في اواخر ٢٠١٩ بعدت عن المجال وبطلت بسبب ظروف دراسية ورجعت يوم ١/١/٢٠٢١ بأغنية “come back” بشكل جديد ومغير جلدي تماما لدرجة الناس استغربت وافتكرت اني حد جديد والحمدلله ردود فعل الناس كانت أكبر من ما كنت اتوقع والحمدلله الاغاني بتاعتي ظهرت علي التليفزيون ٨ مرات عن طريق قناة yousat tv وقناة free tv
وشاركت في اعلان لسه منزلش ان شاء الله هينزل قريب
وقبل كدا شاركت في حفلات كتير في قصر ثقافة سوهاج واماكن تاني غيره وعيد سوهاج القومي بحضور محافظ سوهاج .
اخر أعمالي كانت اغنية “tarsh” عاليوتيوب بالتعاون مع اخويا وحبيبي البروديوسر مصطفي الهواري وحاليا بستعد ان شاء الله لنزول اغنية جديدة بعد العيد وان شاء الله الصيف دا هيكون في البوم لسه مش عارفين هيكون كام اغنية بس شغالين عليه.
في النهاية من لا يشكر الناس لا يشكر الله لازم اشكر اخواتي الكبار الامير شيتوس وحفيظ علشان هما اللي علموني وساعدوني في بدايتي ولحد النهارده
وطبعا طبعا لازم اشكر اهلي علشان هما اللي دعموني وقت ما مكنش حد مصدق فيا او بيدعمني
وطبعا لازم اشكر اصحابي القريبين مني علي دعمهم المتواصل ليا واللي بسعا اني اكون حاجة تشرفهم ويفتخرو بها.
ومهما كانت الظروف والضغوط اشتغل واسعي واصبر علشان تكون قد اللي بتحلم به وبتتمناه وتستحقه.