العيد زمان

زمان
في العيد وأنا صغير
حاجات جوايا كات ثابتة
وعمرها يوم ما تتغير
أكيد أجيالنا عارفينها
وفاكرينها وحافظينها
ولما بس بتعدي على أرواحنا
بنتمنى ولو لحظة من ازمانها
ده لبس جديد
ليوم العيد
قميص مكوي
وجينز أزرق
وجزمة سودة بشرابها
وبوزها حديد
وساعة جميلة بالألوان
ونظارة وشمس كمان
وبالليل
تيجي حمّايتنا ليلة العيد
في طشت نحاس
ولمبة جاز على الزاوية
وكرسي مقاس
وتقعد فاقد الإحساس
وتقعد جوة طشت المية مستسلم
لمية ساخنة وبتغلي
وعليها بخار
وليفة خشنة مقصوصة
بإيد جزار
وكعب صابونة نابلسي
في إيد جبار
وحجرة سودة منقوشة
عشان الرجل تتصنفر
وتبقى نهار
وتبدأ رحلة التعذيب
كأنا ف نار
وساعة مرار
صابون بيخش جوة عنيك
ومشط نحاس بيجلي إديك
وإيد عشماوي على ظهرك
بتغسل فيك
وضربة يمين وضربة شمال
ميمنعشي
عياطك برضو مش هيفيد
مينفعشي
ولو صرخت أو بتموت
تلاقي الصوت
خلاص اسكت يا متنيل
ومتعيطش يا عيل
عليك طبقات وسخ وتراب
دي آخرة لعبك الدايم مع الأصحاب
عياطك مش هيمنعني أنظف فيك
وتستسلم يا حيلة امك
فمهما عملت هتكمل
ولازم غصب تتحمل
وتنفض عنك المية وبإديها
تحس الجسم متكهرب
وتفتكر ان حد عميل بيتعذب
خلصنا خلاص على جوة
بسرعة تنام
قوم اتنيل وخش قوام
أروح أوضتي
وأجيب الطقم وأرصه
في طرف سرير
وانام جنبه وانا فرحان
وحلمي حرير
واقوم الصبح من بدري
عشان ألبس هدوم العيد
واسرح شعري بزيادة
وازبط روحي في مرايتي
وكالعادة
أروح لأمي وأبوس إيدها
وأنا فرحان
وتدعيلي كده دعوة
بصلاح القصد والنية
وأنا قصدي هاتي عيدية
ولو مخدتش يوم بالها
أروح فارد لها إدية
واروح لأبويا في سريره
وانادي عليه
يا حاج العيد هيتصلى
هنعمل ايه
يا حاج قوم هنتأخر
مكسل ليه؟
يروح قايم ويحضني
ويقوللي يا واد
يا أغلى حد في الدنيا
زين الأولاد
ويحميك ربي
م الدنيا و م الحساد
ويضرب إيده في جيوبه
يجيبلي جنيه
أبوس إيده وأدعيله
يا رب الكون لنا تخليه
نروح مع بعض بنكبر
نصلي العيد بفرحة
كل يوم تكبر
وبعد الخطبة بنسلم
على ناسنا وأهالينا
نهني العيد بفرحتنا ببعضينا
أروح على عمي أو خالي
وأقول يا عمي يا طيب
يا رب تزور نبينا الزين كده قريب
ولو طنش
أقولها تاني وصريحة
يا عمي الحاج افهمني
كل سنة وانت طيب
ولو طنش
وما بصش قوام ليا
أقوله يا عمي خلصنا
وأمد كفوفي وإدية
يقوم ضاحك ويحضني
ويديني كده عيدية
وأطوف
على كل أعمامي وأخوالي
واعد فلوسي واموالي
بقوا خمسة
بقوا سبعة
بقوا عشرة
أروح وبسرعة للدكان
وأجيب لي مسدس الخردق
بيعمل صوت وبيزعق
وزمارة وصفارة
وطربوش سادة وملون
وسيارة
ونركب جوة مرجيحة
حديدة بس كات في قلبنا مريحة
ونتمرجح ونطلع فوق
وخالي هيقلب الصندوق
نسقف له ونهتف له
ومزاجنا يروق
وهات لك عجلة أجرها ونتسابق
ولما كنا نتخانق
بنتصالح عشان يوم عيد
نزور مع بعض عماتنا وخالاتنا
وبعد الظهر بنروح على بيوتنا
نلاقي الأكل متحضر
ومحشي أكيد
ناكل صباعين على الهادي
وحتة لحمة مقسومة وبتنادي
واروح نايم على نفسي
وانام عادي
واغير تاني لبس جديد
واروح لزميلي واتفسح
ونتسابق ونتمرجح
في يوم العيد
يا ريت يرجع زمان تاني
بفرح العيد

طه رضوان
الجمعة 21 إبريل 2023 م