مشيرة موسى تكتب ” ملهاش إعادة .. عيشها بسعادة “

انا من الناس اللى بيحبوا يسمعوا ” الجملة الحلوة “، ممكن تبقى جملة فى كتاب، بيت شعر، كلام اغنية، أو حتى كلام حقيقى طالع من القلب، فجاة لازم هتلاقونى باقول ” الله. ”  ولو اقدر اقول ” اعد ” أو” كمان ” هقول، للأسف اليومين دول مبقاش بيبهرنى الكلام  حتى كلام اغانى الحب بأااااه سطحى أو عبارة عن خناقة، علشان كده باسمع القديم، عربى وانجليزى وساعات فرنسى، نسميها نوستالجيا، نسميها حنين، اهو قديم واصلى وخلاص.

ده حتى المزيكا فيها جمل لازم يتقال عليها ” الله “، من أقل من اسبوعين حضرت حفلة للفنان الرائع عمرو سليم على المسرح الصغير بدار الاوبرا، مزيكة عمرو حاجة تانية، هو بيعزف مزيكة الأغانى اللى كلنا عارفينها وممكن نكون سمعناها عشرتاشر الف مرة، لكن من ايدين عمرو وبيانو عمرو المزيكا حاجة تانية، مزيكا” متشفية ” صعب تطلع بالجمال ده من البيانو اللى مش معمول علشان يعزف نوعية المزيكا الشرقى دى (حاجة لها علاقة بالربع تون واللى مش هقدر أفتى فيها كتير )، المهم ان مزيكة عمرو وفرقتة بتدخل القلب والعقل وبتخلى كل اللى بيسمعها يقول ” الله “، و “اعد ” و
” كمان ” من غير تفكير.

وعايزة اقول لكم ان تأثير مزيكة عمرو بيستمر لساعات بعد الحفلة مش بس كده لكن كمان الرائعة شيرين زوجته بتحرص على تصوير الحفلات ” لايف ” علشان اللى مقدرش يحضر الحفل يقدر يستمتع هو كمان. 

نرجع للكلام الحلو والجملة الحلوة، كل يوم الصبح، وانا باشرب النسكافيه المعتبر بلاقي ما لا يقل عن ١٠٠ رسالة على الواتس اب، كلها من حبايب بيصبحوا، ربنا يخلى الحبايب، نص الرسايل دى “ورد على فل وياسمين “، للأسف لازم تتحذف علشان بتتقل الموبايل، و٣٠ % ادعية بالصحة والهداية إلى آخره، ودى كمان لازم تتحذف، و١٠ % ناس كلفت نفسها تكتب ” صباح الخير ” مش تبعت حاجة مطبوعة، ودى بعد كام يوم بتتحذف كمان لنفس السبب، يفضل ايه بأااااه .. الكلام الحلو اللى لازم أقف عنده واقول
” الله “، ساعات بتبقى جمل فلسفية وساعات بتبقى” حكمة ” تستحق التفكير والتأمل، وساعات آيات قرآنية، الكلام والجمل الحلوة دى فى كتيييييير من الأحيان بتيجى كرسائل خاصة جدااااااااا فيها نوع من الطبطبة والتشجيع، هاكتب بعض من هذه الجمل، 
ملهاش إعادة، عيشها بسعادة، 
 لو ركب الانسان الريح هربا من رزقه لركب الرزق البرق ليلحقه،  لا تقنطوا من رحمة الله، وتظن من فرط لطفه بك انك عبده الوحيد، 
انا قاعدة باسمع الست ام كلثوم دلوقتى، وعمالة اقول بصوت عالى ” الله ” .. ربنا يحلى لكم أيامكم.